نتيجة الانتحابات فى المرحلة الأولى.

                           

   بعد أن انتخبت، حقا انتحبت، وظللت أنتحب وأنتحب لما رأيت فى المنام:

 حلمت قال خير اللهم اجعله خير، شفشق راكب كارتة وبيتمشى ع الكورنيش، جايبها من صعيدها لبحرها، بس الكارتة اللى هو راكبها غريبة جدا، بيجرها خمسة وتمانين مليون حمار، وشفشق مطلع لسانه وبيكايدهم، وماسك فى إيده جزمة، وبيقول اللى هاتطلع الجزمة دى مقاسه، يتشاهد على نفسه وعلى مليون حمار من اللى حواليه. ورا الكارتة ماشيين جماعة حافيين، منهم ناس بدقون وناس من غير دقون، عمالين يعيطوا ويصرخوا، وشفيق يقول لهم "هى خطبتنى" يقولولوا "والله غصبن عنها" يقول لهم "أبدا، دا أبوها موافق" يعيطوا ويعيطوا... ووراهم واحد راكب جرار، قال يعنى جرار زراعى، لما طلع النهار لقيوه دبابة، وعليها عسكر مهرة. والناحية التانية ع الكورنيش جماعة سابقين الموكب بمسافة، بيكنسوا الأرض وبيشيلوا الحجارة عشان الحمير ماتعفرش على سيدهم وهم ماشيين، صحيت من النوم لما ماستحملتش أشوف النيل بيبكى وينتحب من غير دموع، لأنهم حبسوا دموعه ورا السد من سنيييييييييييييين!!!!!!!!!!!!